Da Brugine (PD)

I casoni nel Padovan e ne ’a Sacìsica

Cason Bianco “Ramei” a Piove de Sacco.

Cason “Rosso” a Piove de Sacco.

Cason “Azzurro” a Vallonga de Arzergrande.

Se sà che i casoni ga scominsià a ciapare eà forma che se conosse a i primi del 1900, vegnendo fati secondo ’e capacità dal contadin che dopo eó abitava, e par coesto no’ i jera tuti uguài, sicome eà parte pi difìssie jera el coerto, i ciamava el casoniere che lo faseva par mestiere. Savere coanti casoni che ghe jera nel Padovan xe difìssie, parché no’ i vegnéa censìi, ma secondo el prof. Paolo Tieto nel so bel libro “I Casoni Veneti” (Panda Ed.), se lese:
Numero de i casoni, inizio 1900, ne la provincia de Padova: S. Giorgio in Bosco 45 - Tombolo 31 - Piombino Dese 69 - Campo S. Martino 61 - Campodarsego 38 - Villanova di Camposampiero 40 - Vigonza 102 – Saonara 206 - S. Angelo di Piove 80 - Legnaro 250 - Maserà 34 - Brugine 150 - Polverara 47 - Piove di Sacco 320 - Bovolenta 49 - Terrassa Padovana 35 - Arzergrande 120 - Codevigo 161 - Pontelongo 34 - Conselve 98 - Arre 49 - Candiana 50 - Correzzola 180 - Agna 51 - Anguillara Veneta 28 = Totale 2.328.
Casoni ne la Sacìsica nel 1959: Piove di Sacco n. 25 - S. Angelo di Piove 34 - Legnaro 28 - Polverara 11 - Brugine 11 - Bovolenta 4 - Arzergrande 29 - Codevigo 25 - Correzzola 14 = Totale 181.
Casoni de la Sacìsica nel 2022 = 3: dó se càta a Piove de Sacco: “Ramei” e “Rosso”; el terso, “Azzurro”, se cata a Vallonga de Arzergrande, tuti e tre visitàbii (Internet Casoni di Piove).
De sti tre casoni contaremo calcossa nel prossimo numero. Eà fine de i casoni xe vegnùa co’ eà lege 640 del 1954, voendo el risanamento de ’e case malsane, obligando i paroni terieri, dove sti contadini i laorava, de regaearlo co on tòco de tera intorno, e el governo ghe ga dà on finanziamento par costruire eà casa nova. E cussì dal 1960 i casoni i risultava tuti abatùi o lassà ’ndare ramengo; da coesto se poe considerare anca eà fine de on modo de vita contadina che durava da sècoi.
El cason vegnéa associà a ’e quattro “F”: fame, fredo, fumo, fastidio. Eà costrussion vegneva fata co’ materiài che ghe dava eà natura intorno: tera crea, paja, cane paeustri, rami e tronchi de àlbari. De sòito i gavéa eà forma retangoare. Sofito basso, finestre pìcoe e pavimento de tera batùa. ’E piere par fare i muri le faséa in casa inpastando paja e tera crea e messi e secare al soe. I piastri portanti i jera fati co’ tronchi de legno forte parché i dovéa tegnere el teto a forma de cono, coerto co’ ’e grisiòe o paja. Nonostante ’e modeste dimension i jera abitài da fameje numerose e de tute ’e età, insieme co’ coei animài che jera essenziài par eà sopravivensa: vache, mussi, porsèi, poastri, arne e coniji. Sora ghe jera eà tesa par el fen e scorte de viveri par i mesi invernài.
El gabineto jera a la turca, fora al verto. Par lavarse i usava el portacain in fero co’ eà zara e par vasca da bagno el mastèo de ’a lissia. El tuto jera guidà dal pi vecio de ’a fameja, dirigendo i laori de i canpi, e eà mojere doveva badare a i mestieri de casa. Ne ’e sere invernài i se muciava ne ’a stàa, fasendo “fiò” dove el fià de ’e vache e eà déboe luce del canfìn ghe dava on tiepido caeore; contàndose proverbi, indovinèi, storie de orchi e strighe, ma anca cantiene, fiastroche e po’ i faséa scoe, seste, sbalzi, crosi de legno pa’ e rogassion, ma anca zogàtoi o ritocare scarpe, sòcoi e arnesi da laoro.

[torna sopra]