Da la Bassa Veronese

Adriana De Togni Cappellari na Mama speciale

El soriso de Adriana De Togni Cappellari, tra i fiori del sole.

Paolo Cappellari

I neodi de Adriana: l’ing. Mattia e el dr. Enrico Cappellari con la dot.ssa Virginia Zanardi.

Me capita spesse volte de passare vizin a la so casa, dopo la visita a i nostri cari al Camposanto; posto la bicicleta a la mureta del cancelo e sono el canpanel par saludarla. Ela la me vien incontro su la porta, soridendo. Ancó inveze l’ò sentìa par telefono. Me son informà su la so salute e dopo go dito:
– Adriana, la me parla on poco de ela…
“Mi son nata a Legnago nel 1936; prima de sposare Paolo son senpre vissùa a Cerea con la me fameja de origine. Son stà seconda de tri fradèi, un maschio e na sorela più vecia de mi. La me fameja l’era formà da agricoltori e alevatori de la media borghesia de Cerea. Me papà el gavéa na azienda agricola indo’ che el coltivava on fruteto e el conduséa na stala de bovini da late.”
– Che interessi, che passion gavéela da buteleta…
“Mi era tanto passionà par el calcio; ò scominzià a zugare fin da pìcola, in porta, in te na squadra maschile. Me piaséa tanto anca lézare; amava la leteratura e la danza.”
– Sò anca che, deventando granda, ghe piasèa fare i viagi…
“Sì, anca questa l’era la me passion; me piaséa viagiare in Italia, ma anca a l’estero.”
– Come ala conossùo Paolo?
“Paolo el vegnéa tute le matine a tóre el late da me papà. Lu el vegnéa da na fameja poareta assè: l’era el quinto de 7 fradèi; prima el doparava on calesse, dopo l’è passà a on furgon e con quelo tute le matine el faséa la spola, passando da i alevamenti de la produzion de late de la Bassa Veronese; el toléa sù el late apena monto e el lo portava ne i caseifici de la zona. Avendo ocasion de védarse tuti i giorni, emo scominzià a conóssarse senpre de più.”
– E dopo?
“ Dopo s’à presentà on problema: Paolo el gavéa 11 ani più de mi e in chei ani la gran difarenza de età no l’era par gnente ben vista. Alora ghemo avù on periodo pitosto conplicà e i mei de casa i m’avéa ostacolà non poco. Dopo però jà considerà la perseveranza, la costanza de Paolo. A la fine, ste bele qualità le à influìo in modo positivo su la me fameja e cussì semo rivà a farse morosi.”
– Quando ve sìo sposè?
“S’emo sposè a San Pietro di Legnago el 17 magio del 1958; emo fato on breve viagio de nozze a Sanremo, indo’ che Paolo el gavéa on afare da portare a termine. Praticamente mi son senpre stà in casa de amici, parché Paolo el gavéa na comission de vendita de on teren da parte de on so conossente. Finìo l’acordo de afari con la controparte, con esito positivo, semo tornè a casa.”
– Dove sìo ’ndè a stare?
“Prima semo stè a Roverchiara, dopo a Verona par du ani; ne i primi ani del matrimonio par on novo lavoro de Paolo, semo stè a San Martino Buon Albergo; l’era responsabile del magazzino de na dita che racolieva e inmagazinava patate. Là è nato Giorgio, el nostro primo fiolo. Dopo semo tornè ancora a Roverchiara, in coabitazion co i suoceri e parte de i fradèi.”
– Nel fratenpo è nati i altri fiói…
“Sì, in tuto zincoe: oltre a Giorgio, Paola, Alessandro, Giovanni e Davide.
– Quante atività lavorative alo intrapreso Paolo?
“Devo dire che no l’era mia facile stare al passo de Paolo; lu mediamente el dorméa 4 ore par note; el girava senpre par i marcà, el prestava atenzion a le borse granarie e merci de tuta l’Italia del Nord. Questa l’è stà la forza-base de me marì; el ciapava conossenza de tuto e l’intervegnéa, dando el so parere e altro ne le decisioni economiche e de l’inprenditoria.”
– La me dise anca che Paolo come caràtere l’era pitosto individualista…
“Comunque, come ò za dito, l’ò senpre seguìo tegnendo la contabilità e dàndoghe assistenza fiscale, visto che me papà Antonio l’era ragioniere e el savéa ben fare de conto.”
– E cussì l’è rivà a far nàssare la Fomet…
“Sì, devo dire che, par la nostra azienda Fomet, st’ano vien ’vanti na ricorenza speciale: 49 ani de età a partire dal 1973, quando l’è stà fondà da me marì Paolo. Devo amétare che l’è on bel sucesso aziendale, de gran inportanza par el nostro paese…”
– Mi sò, cara Adriana, che ela l’è stà senpre na presenza utile per Paolo… L’è propio el caso de dire che vizin a on grande omo ghè na grande dona.
“Beh, grazie! Anca se ben inpegnà co i fiói e la conduzion de la casa e de la fameja, ò senpre seguìo me marì. Go senpre ajutà a tegner in órdene la contabilità; on laoro inpegnativo, considerando la vivacità lavorativa de Paolo.”
– Però gavì senpre trovà el tenpo de fare de i bei viagi…
“Sì. Emo viagià tanto, qua in Europa e anca nel continente americano.”
– No la s’à mai risparmià, cara Adriana, gnanca ne la so passion par la leteratura e l’opera classica…
“Sì, ò anca senpre partecipà e dato la me adesion a tante iniziative, colaborando con Enti benefici e de carità.”
– E dopo tanti spostamenti tra Roverchiara e Verona, adesso la se gode la so bela casa qua a San Piero de Morubio, co i fiói e le so fameje...
“Sì, propio cussì! Go la sodisfazion de gòdare la presenza de óndese neodi, oltre che on proneodo in arivo…
Ne l’azienda Fomet, oltre che me fiói, ghè ativa la terza generazion co i neodi Virginia Zanardi, Mattia e Enrico Cappellari che i lavora, basàndose su i insegnamenti de so nono Paolo, fati de onestà, responsabilità sociale e etica ambientale.”
– Questo me fa capire che na fameja ben inpostà l’è senpre on tesoro prezioso! Nel ringraziarla de sta so testimonianza de vita, la me lassa dire che el bon andamento de na fameja dipende tanto da done come ela!

[torna sopra]