|
El filò de i Wigwam
Chiara Barzon
El fogo de Sant’Antonio e la cura tramandà
 | | Chiara co so popà Michele e so mama Carla Capuzzo su el Piagno de i Poeti, al Circolo Wigwam de Arzerello. |
Chiara, la ga da poco conpìo i so disdoto ani; da grande la vorìa fare la stilista e la va a le scole giuste pa ’sto futuro da costruirse. La xe anca uno de i zóvani che ga laorà al Cantiere Partecipativo par el recupero de ’e tradission locài promosso da Wigwam insieme a l’AUSER de Sant’Angelo de Piove, on progeto sostegnùo da un contributo de la Regione Veneto parché, tra le altre, el promove el raporto tra i zóvani e i ansiani. Queo che inquò se ciama el dialogo intergenerazionale. Na maniera de trasferire el savere tra le generassion che na olta jera fato in te i filò e quando che le fameje jera numerose co anca i veci che restava in casa e, tra le altre, i se ciapava cura de i putèi. E, magari solo par tegnerli boni, i ghe contava storie, modi de dire e proverbi, el più de le olte sentìi da i so noni.
Chiara la ga recuperà e la ne ga contà, de la tradission de fameja de èssare boni de curare el Fogo de Sant’Antonio, sensa medesine e a la vecia maniera.
So mama Carla, la ghe ga contà che par ben ventisinque ani lo ga visto fare da so nona, la ga inparà e ’desso lo pratica diretamente éa. El xe un virus che el ciapa el nome de San’Antonio Abate, queo che i nostri veci contadini ciamava “Sant’Antonio del porsèo” e che anca mi me ricordo che i ghe ne tegneva un quadreto in te le stale, parché el xe invocà come protetore de i animài.
El nome de sto virus xe Herpes Zoster, e el fa vegnere vessighe rosse, dolorose assè, che dopo le s’ciopa, le se seca e le poe deventare brose. El xe el stesso virus che fa vegnere la varicella, che el poe restare fermo in te i nervi e vegnere fora quando che el fisico el xe particolarmente strassoto.
A la maniera tradissionale, Carla la conta, se cura cussì: “Ghe dago fogo a le ponte de un scoato de mèlega (sasgina) e se ghe passa de sora la parte invessigolà sensa tocarla. El se lo fa più volte par 10-15 minuti a seconda de la gravità de ’a malatìa, par qualche dì, e anca setimane se l’estension e la profondità de le vessighe xe inportante”. Carla la rimarca che sta tènica la ga eredità da so nona e che la vien tramandà a ogni primogenito. Info: chiara.barzon04@gmail.com
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ciàmeme co ’l me nome!
Ve pararà inpossìbile, ma ghe xe calcossa de vèro so ’l titolo de sto editoriale. El fato xe che mia tuti ghe piase de sentirse ciàmare “NONO” o “NONA”: forse ghe pare de vegnere marcà a fogo co ’l nome de Matusaleme. Gnente da dire, ogniuno ga i so gusti!
de Mario Sileno Klein
Da Venezia
I Procuratori de San Marco
de Armando Mondin
Ciàcole visentine
La “via Querinissima”
La Confradèrnita del Bacalà a la Visentina se dà da fare par la valorisassion stòrica del viajo Venessia-Røst-Venessia fato ’ntel 1432 dal nòbile Piero Querini.
de Giordano Dellai
|
