|
Da Maran Lagunare (UD)
Colpa de tanto caldo
 | | Ciapà caparóssuli co le man ’torno el paese. |
 |
<> me fa el Marani, ’pena rivò sul molo, dopo vè pescò duta la note co i selini.
Tanti ani fà in piena bondansia de miseria, de inverno, naltre pescauri vevomo sol dó-tre mistieri pa podè ciapasse de vive: cape de déo co ’l bail in marina, ’ndà a gò co ’l brasso e ciapà caparóssuli con le man ’torno el paese.
El mistier de ciapà i gò con le nasse el gereva squasi sparìo parché no ghe ne gera bastansa par vadagnà la zornada. In sti ultimi ani però, i gera tornài e i pescauri i veva riciapò in man el mistier.
Povero palùo, martorisò da l’inquinamento, canài sichi, òstreghe portoghese che inpestò intiere zone del palùo, con la seca le vien sora aqua a ruvinà el bel vede del panorama.
I primi de genaio pàssere e passarini ’pena nati, i vien drento in palùo e in aprile-magio i sparissi parché no i trova più el so anbiente, el bon fango de na volta, sensa desmentegasse: Cormorani, Sfrìsuli, Cocai, Baiani e chissà trope altre bestie che no le me sovien, anca lure brave de magnà el pesse novel.
Alghe che ogni ano le invadi senpre de più i giughi buni ’ndove pescà e, come se no bastissi, sto ano xe rivàe le pote marine, quele grande, che co te tiri sù la rete, tante volte la se runpi, lassando bei busi grandi.
E ’desso, el Marani el me ga dito che xe morti duti i gò, causa el caldo grando che ’l ga magnò duto l’ossigeno.
Piantàe la nassa (piccolo bertovello), con la colma, sora na peta de erba, intanto che spetevo el momento de ciola suso, vardevo la sia che i gransi pestài (esca per la cattura del gozzo) che de drento la nassa la ’ndeva verso la tana sgavada ntel fango.
Un pesse, ’pena nasò l’odor, el vien fora dal so buso e el segui el fumo lisier del pesto e pian pianin, giutàndose con le ale e la coa, lo vedo entrà ’nte la nassa e magnà el pasto che vevo preparò par elo.
E ’desso, tropi ani ga de spetà i pescauri pa’ tornà a vede ste bele robe!
[torna sopra]
|
