|
Editoriale
Ciàmeme co ’l me nome!
Ve pararà inpossìbile, ma ghe xe calcossa de vèro so ’l titolo de sto editoriale. El fato xe che mia tuti ghe piase de sentirse ciàmare “NONO” o “NONA”: forse ghe pare de vegnere marcà a fogo co ’l nome de Matusaleme. Gnente da dire, ogniuno ga i so gusti!
 | | Vien coà valà, ché te dào on baseto! |
Vate a capire ti, da cossa dipende sta spece de paura che la infeta sia òmeni che done che i se cata ne la categorìa de i “anta” e no la ghe va zo de sentirse ciamare “nono” o “nona”. Capìmose ben: ghe xe tanti tipi de “anta”: i quaranta, i zincoanta, i sessanta, i setanta, i otanta, i novanta…
Ghe go pensà on poco a sto fato e me xe vegnù in mente che calcossa del gènare, tanto tenpo fà, la me xe capità anca a mi. Non par colpa mia, ma par la furbizia de na me nevodeta, oncò pi che magiorene.
Semo a on pranzo de matrimonio, co parenti e amissi e conossenti. Viene che on me cugnà el ghe fa a sta squinzi de la me neodeta Martina:
“Vèro, Martina: chi è questo signore che è qui con me?” co ’l ciaro intento de farme ciamare “nono”, par el gusto de farme sentire vecio, visto che el so “anta” personale el jera ben pi alto del mio. Insoma el zercava de sfótarme o de torme de berta, ma no ’l ga avù sodisfazion, parché el s’à sentìo rispóndare:
“È un amico del mio papà!” Che po’ so “papà” el sarìa me fiolo! In chel momento, me cugnà l’à mandà zo el rosco, e mi, co on soriseto de circostanza, a go dà on baso co ’l s-cioco a la me amata neodina.
La pìcola sodisfazion de chel momento, oncò, ripescà te l’armaro de i me ricordi, me fa parlare de sto sentimento selvàdego che se svilupa ne l’animo umano, quando uno se mete in testa che “nono” voja dire vecio bacuco, ormai insemenìo dal peso de i ani. Gnente de pi stupido!
El valore de la figura del “nono” no dipende da l’età, ma da la risposta al reciamo del sangue.
Pol capitare che uno el sia a metà de la scala de i “anta”, che magari el sia ciapà co ’l laoro, co la cariera o ’l sia stravià da le conpagnìe bontenpone. E alora el sentirse ciamare “nono” el ghe disturba e xe la volta che al neodeto el ghe dise: “Ciàmeme co ’l me nome!”
Ma questo el xe on “disturbo” provisorio e te vedarè che, ’pena che ’l va pi in sù de coalche scalin so la scala de i “anta”, no ’l ga pi paura de chela parola, anzi el ghe ciapa gusto e, ripetendo l’invito “ciàmeme co ’l me nome”, el rinuncia al nome ch’i lo ciama tuti, par farse ciamare “nono” da la voze del sangoe, el so neodin, anca se pa ’l putin te si on Matusaleme!
In fin de i conti, no se trata de na malatìa da stare in leto, ma de na fase de la vita, che xe na fortuna poterghe rivare, anca se la te riva a sorpresa, senza che te te la speti o no te si preparà a torte le to responsabilità, a costo de coalche rinuncia.
A sto proposito, me ga colpìo na frase de Tom Hanks, atore, regista, produtore cinematografico e televisivo statunitense: “Viviamo in una società dove nessuna legge proibisce di pensarla a modo proprio, diffondendo spesso, in questo modo, ignoranza e stupidità.”
Nessun ne dise, dunque, de pensarla come na parte de sto mondo, ma xe mèjo pensarghe dó volte, prima de farghe l’ocio bruto a chi ga el dirito ‒ on neodeto ‒ de “ciamarte co ’l nome” del to sangoe.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ciàmeme co ’l me nome!
Ve pararà inpossìbile, ma ghe xe calcossa de vèro so ’l titolo de sto editoriale. El fato xe che mia tuti ghe piase de sentirse ciàmare “NONO” o “NONA”: forse ghe pare de vegnere marcà a fogo co ’l nome de Matusaleme. Gnente da dire, ogniuno ga i so gusti!
de Mario Sileno Klein
Da Venezia
I Procuratori de San Marco
de Armando Mondin
Ciàcole visentine
La “via Querinissima”
La Confradèrnita del Bacalà a la Visentina se dà da fare par la valorisassion stòrica del viajo Venessia-Røst-Venessia fato ’ntel 1432 dal nòbile Piero Querini.
de Giordano Dellai
|
