Da Venezia

I Procuratori de San Marco

’E procuratorie in Piassa S. Marco. (foto A. Mondin)

’E case de i Procuratori dopo el restauro, in Piassa San Marco (foto ioArch).

Ne ’a Serenissima ’a carica de Procurator de San Marco el gera el tìtoeo più inportante dopo queo del Doge, e sóeo come par lu stesso ’a gera a vita. Co precision no se sa ancora quando che sta carica ’a ga ’vuo origine, forse el primo Procurator el ze stà nel IX sécoeo, selto tra i Patrissi. Nel tenpo, al primo, se ne ga zontà naltri oto che in tuti quanti i se divideva in tre Procuratorie: de “supra” che curava ’a Basìica de San Marco, de “ultra”, par i beni ereditài de là del Canal Grando, de “citra” par quei che stava al de qua.
Dita cussì non ’a par na gran roba, ma invesse de fronte a l’inportansa de ’a giustissia e del vaeor de i schei da tutear che vegneva da i testamenti, ’a gera davero inportante come quea de governar ’a Basìica de San Marco co el so imenso tesoro. Tra i Procuratori, a volte, se selieva el Doge.
Anca sta volta sugerisso de aprofondir ’a storia de i Procuratori e de i so incarichi, parché mi ve contarò sóeo calcossa altro che riguarda l’antichità e anca el nostro tenpo e el ze un argomento cussì inportante da no poder èssar contà ne ’e poche righe disponìbii.
Par i Procuratori, Patrizi e siori, ’a Serenissima gaveva deciso che sti òmani i gavesse casa in Piazza de San Marco, un priviegio che el gera sóeo par lori, in modo che i fusse senpre vissini a i loghi del potere de ’a Repùblica, sia par prestigio, ma anca par ’verli soto controeo a un tiro de oci da Paeasso Ducàe, anca se i Procuratori i gera selti tra i citadini venessiani più degni de sta carica, insoma i mèjo.
Par questo vegniva costruìe ’e Procuratorie in Piassa, dove i Procuratori doveva vìvar.
Abitassion grande, bèe, piene de spassi e beessa. Nel tenpo vegniva costruìe de fronte a ’e prime procuratorie, quée nove dove ’e ze stae trasformàe nel Paeasso Reàe voesto dal tristo Napoleone, dopo ’a fine de ’a Cità del Leon.
Insoma ste abitassion ’e ga fato parte de na storia antica e fondamentàe ne a vita de ’a Repùblica de San Marco, che sarìa stà da conservar par dentro e par fora.
Invesse no ’a ze ’ndada proprio cussì, parché dopo ’a fine de ’a Serenissima, quasi tuto queo che la gaveva rapresentada el vegneva robà, abatùo, trasformà in calcossa altro.
Anca se maeamente, ’a Piassa de San Marco, a parte ’a distrussion de ’a stupenda Cesa de San Geminiano, de i tanti leoni marciani e, come go dito sora, de el rifacimento de ’e procuratorie nove, i esterni restava in parte quasi come in origine.
Ze stà par dentro che se ga comincià a cavar ’e vene del tessuto artistico e èdie de i paeassi e de ’e case.
Cussì rivemo che ’e procuratorie vece, ’e prime fate, ’e ga ’vuo tanti canbi, tanto da èssar senpre più snaturàe dentro, fin a quando ’e Assicurassion Generài ghe ne ga fato ’a so sede, rovinando quasi tuto el poco restà de ’e case de i antichi Procuratori de San Marco.
Poche setimane fà, dopo longhi restauri de quée che gera ’e Assicurassion, ze stà verto un museo e queo che me ga colpìo ze stà che na parte de ’e scae ’e ze stae coverte co un material che el pareva resina o plastica e che dove i ga restaurà el muro a facia vista i lo ga fato in na maniera che a mi non me par gnente a règoea d’arte, parché ’e fughe tra piera e piera no ’e ze stae curàe tanto da parer quasi na spece de pitura, drito, zaeto come ’a sabia de fiume e ’a calce doparada par far ste benedete fughe.
A i me tenpi, se un lavoro el vegneva fato cussì, ’a Sovraintendensa lo faseva rifar a spese de l’inpresa.
Comunque, a parte questo, no capisso anca perché na parte de ’e scae no ’e ze stae ’assàe a vista.
El tuto el me par na totàe mancansa de rispeto de ste stanse che ’e dovarìa ricordar el passà glorioso de i Procuratori de San Marco, e sinceramente sto restauro el me par na continuassion de ’a distrussion cominciada da Napoleone che sicuramente voeva cancear tuta Venessia.
L’idea de far deventar Venessia come tute st’altre capitài europee, in gran parte, no ’a ze riussìa gnanca co ’l Bonaparte, i ocupanti austriaci e ’a monarchia de i Savoia. In sti ultimi ani semo drio continuar sto stupro de ’a cità più bea del mondo, tra un serarse i oci e tanta ignoransa.
Se e quando ’a Cità Marciana ’a vegnarà distuta, vorà dir che no ghe sarà più gnente da far anca par l’umanità, e i sindaci che se credeva Napoleone, so’ sicuro, che anca sul confin de ’a fine de tuto no i se acorzarà de gnente.

[torna sopra]