Da Brugine (PD)

I trèdese fradèi Maniero

I 13 fradèi Maniero in scàea, ne i ani ’50

Eco l’Orchestra de i “Fratelli Maniero”.

I fradèi Maniero nel 2020.

Finendo de parlare del tenpo de “coando se cantava”, me fa piassere ricordare che fra i ani ’40-’60, girava pa ’e piasse e ne ’e sagre venete, na orchestrina fata da on s-ciapo de fradèi, direti dal popà, ciamài da tuti “I Fradèi Maniero”, e sicome eà fameja ogni ano la se ingrandiva, on serto momento se ghe ne contava ben trèdese, tosi e tose in scala, e tuti co’ el so strumento in man, cantando e sonando ’e pì bèe canson che piaseva tanto a eà zente, framentàndoe co’ barzeete.
Prima Rosa (fioa nùmaro ùndese) la conta che tuto jera scominsià coando popà Luigi, gavendo el problema gionaliero de métare in tòa on piato co’ calcossa da magnare, na matina el xe partìo par ’ndare al marcà, e al ritorno, el xe rivà co’ na fisarmonica, fasendo rabiare de bruto eà mojere.
Ma Luigi, che jera on tipo alegro (el so forte jera contare barzeete), essendo gran amante de ’a musica, jera so desiderio de fare ’nparare a so fiòi a sonare on strumento, pensando che on dì ghe dasse anca da magnare.
Mandà a scuoa de musica el pi vecio, el ga continuà dopo co’ tuti st’altri, fasendo eà so prima “uscita” ne l’istà del 1954 co’ i primi 4 fiòi, a Sottomarina, e da coea volta no ’l se ga pi fermà, formando na orchestra de sóeo fradèi; on caso unico al mondo.
I soldini de ’e oferte ’i meteva dentro el tanburo, deventà par ocasion cassaforte e, visto el sucesso, sto tanburo el se inpeniva senpre de pi, riussendo cussì a mantegnere degnamente eà fameja.
Sicome ’e richieste e rivava a maneta, popà Luigi ga dovesto conprare on pulmin, stàndo­ghe rento al massimo 9 persone, el resto jera sorapì, e coando el vegniva fermà da eà poissìa, par no pagare eà multa, papà Luigi el se difendéa, mostràndo­ghe na foto co’ tuta eà fameja al conpleto, diséndoghe: “Questi i xe tuti i me fiòi: secondo voaltri, dove i meto?” On stratagema che ga funzionà senpre.
Na volta deventài famosi, i xe finìi anca so i zornài nassionài, fasendo turnè anca fora Veneto, ’ndando parfin a la RAI e anca a l’estero; a casa, eà mama spetava in pensiero el so ritorno, pregando che no i ’ndasse ’ncontro a coalche incidente stradàe.
Conta ’ncora Prima Rosa che ancò, coando i se riunisse ne ’e feste familiari, ghe voe on capanon par ingruparli tuti, parché fra noni, nuore, cognài, fiòi, cugini e nevodi i fa quasi on paese, e essendo musicisti, i fa deventare sti incontri ’ncora pi alegri.
Dal 1968, dopo eà morte del popà e co ’l canbiare de i tenpi, anca sta atività xe finìa, ma in fameja eà passion par eà musica xe restà, promovendo tante manifestassion, come par esenpio fra l’altro, coea de gavere tegnùo par tanti ani el grupo folkloristico Majorettes de Sant’Angelo di Piove.
Marilisa Maniero gira co’ on so conplesso musicàe, e fra i nevodi, xe famoso Fabiano Maniero, presente in tanti concerti, oltre che èssare prima tronba ne ’a orchestra de ’a Fenice de Venessia.

[torna sopra]