Ciàcole visentine

La “via Querinissima”
La Confradèrnita del Bacalà a la Visentina se dà da fare par la valorisassion stòrica del viajo Venessia-Røst-Venessia fato ’ntel 1432 dal nòbile Piero Querini.

El due alberi Mandrake II che nel 2007 ga fato el viajo da Venessia a Røst.

La Fiat 500 giala piena de bacalà, che nel 2012 ga fato la “via Querinissima” Røst-Venessia-Sandrigo.

Un percorso par rancurare amicissie rento sta nostra vecia Europa, che ga caro de scovèrzere nove ocasion de unità in senso stòrico e anca, e soratuto, gastronòmico. Parché xe stà grassie a sto percorso, ’desso ciamà “via Querinissima”, che quasi siesento ani fà noaltri vèneti ghemo scoverto el bacalà.
Se trata del viajo da Venessia a Røst (Norvegia) e po’ indrìo ’ncora a Venessia, fato dal nòbile venessian Piero Querini ’ntel XV sècolo. Defati gera ’ntel dissenbre del 1431 cò Querini, direto a i porti comerciali de Bruges (Belgio) e Anversa (Olanda), se xe perso in pieno Atlàntico. Con un s-ciapo de supèrstiti el se xe salvà, trasportà da le corenti, su na isoleta de l’arcipèlago de le Lofoten, oltra el Sìrcolo Polare Àrtico, ’ndove i xe stà tirà sù da la popolassion de Røst co na bela cura a base de stocafisso. L’ano drio el ritorno a Venessia co 60 bacalà ’nte la so sporta, che ga fato partire la passion de i vèneti par sto pesse del Baltico, duro e steco ’fà un baston, che prima gera rivà al màssimo in Svizzera.
In sti ùltimi ani la rota del bacalà xe stà ricostruìa grassie a un s-ciapo de cavalieri de la Confradèrnita del Bacalà a la Visentina, con sede a Sandrigo, che ’ntel 2007 ga rifato el viajo par mare de Querini co na barca a vela e ’ntel 2012 invesse i se xe lancià in queo de ritorno al volante de na Fiat 500, de colore gialo ’fà el mantelo de la Confradèrnita o, pi senplicemente, ’fà na feta de poenta.
In particolare sta ùltima inpresa xe stà fata da na delegassion de la Confradèrnita del Bacalà a la Visentina, formà da Fausto Fabbris, ’lora presidente de la Pro Sandrigo, Carlo Pepe tesoriere de la Confradèrnita, Antonio Chemello coordinatore del Grupo ristoradori del Bacalà a la Visentina e atuale presidente de la Pro Sandrigo, e Ennio Dall’Amico rapresentante de i Baccalà Club. El grupo se xe fidà de fare na inpresa granda senpre e dopo ’ncora par festejare a la mejo la Confradèrnita ’ntel so 25° ano da la fondassion, portando casa ’ntel contenpo un bel masso de bacalà sul portapachi de la màchina. El viajo se xe possùo fare anca grassie a la colaborassion de Region Vèneto, Confcomercio Vicensa, Grupo Vicenza e Comitato Europeo de le confradèrnite enogastronòmiche.
L’aventura, durà quasi tuto agosto, xe stà longa quasi otomila chilometri, fati su le rode de na 500 giala, come che se diseva, e tre canper, tuti pieni de materiale informativo su le atrassion turistiche e la tradission enogastronòmica de la nostra region. ’Nte le dòdase nassion europèe che la ga atraversà (Norvegia, Svezia, Gran Bretagna, Danimarca, Olanda, Belgio, Lussemburgo, Germania, Francia, Svizzera, Austria e Italia), la delegassion ga consegnà dapartuto a le autorità civiche e econòmiche na litografia de Galliano Rosset che rapresenta la Basilica Paladiana trasfigurà rento a na nave vichinga, che ga come prua la Tore de Piassa de i Signori de Vicensa e come àlbaro maestro un bacalà.
L’itinerario xe deventà ocasion par sercare contati co le comunità italiane de i stati ’traversài e par scomissiare novi raporti de amicissia o scanbi culturali tra popoli europei de nassionalità diverse. El progeto prevede l’inserimento de la “via Querinissima” ’ntel programa European Cultural Routes.

[torna sopra]