|
Editoriale
Adìo, Quatro Ciàcoe!
Semo za nel clima del Nadale, tenpo de le tradizion, de le nostre raise, de la senplicità de la nostra tera, de l’inpegno e la grinta par fàrghela… Ma noantri ne toca dirghe adio a “l’unico mensile che no inquina la mente”. Che pecà!
 | | La Natività, da un corale de la Biblioteca Capitolare de Verona. |
Viene bona la locuzion latina de Ovidio, che ne ga mandà el nostro amico Toni Corain: “Tempora labuntur, tacitisque senescimus annis; et fugiunt fræno non remorante dies” (Il tempo passa, invecchiamo senza accorgersene, e i giorni fuggono senza che nulla li arresti.)
E noantri ghe zontemo st’altra frase, atribuìa a Ovidio, ma nata nel XVI secolo in Germania, nel corso de la riforma Protestante: “Tempora mutantur et nos mutamur in illis” (I tempi cambiano e noi cambiamo con essi.)
Dopo 40 ani de amore, de passion, de dedizion par salvare la parte bona e senza tenpo che oncora ghe xe drento te la nostra parlata veneta, dovemo adatarse, par question de pecunia, al canbiamento de i tenpi.
I pensieri de dispiasere e delusion che ne gira par la testa i sarìa tanti ma, visto che ormai xe qua Nadale, preferimo tirar fora da la naveta i grani de incenso da métare nel turìbolo e incensare chi se lo merita:
- chi ga fato nàssare, nel dissenbre del 1983, la rivista;
- chi la ga ’jutà co le fotografie, la ricerca storica, la publicità e dispensàndola ne le edicole;
- chi la ga tegnù in piè e la ga aministrà fin a dissenbre del 2015;
- chi la ga eredità e mantegnù da genaro del 2016;
- chi – e i xe stà veramente tanti – ghe ga regalà el propio inzegno, la propia cultura, la creatività, le idèe, la fantasia… deventando “colaboratori”;
- chi ga fato la so parte, cronpando, lezendo la rivista, abonàndose e portando pazienza pa i tanti ritardi;
- chi ga acetà i nostri limiti professionali, sforzàndose de capirne;
- on ricordo e on augurio de “Bon Nadale in celo” ghe lo mandemo a tuti i amici che ghemo incontrà e che ne ga za lassà.
Cussì ’desso gavaremo el tenpo de riciapare in man le 430 riviste stanpà ne i 40 ani, vèdare quante robe ghemo fato e acòrzarse de quele che no ghemo fato.
Cussì cataremo i raconti che parla de come, no tanti ani fà, se passava Nadale ne le nostre case, ne le nostre fameje, rispetando le mèjo tradizion, e rivaremo a capire che oncò… Nadale no ’l xe pi Nadale.
No ’l xe pi Nadale, ma no parché ne vègna la voja de dire: “Védito, ’desso no ghè pi nostra mama che la gavéa 84 ani, ma i tortèi co la zuca, fati a man, che ne faséa éla… Ah! Che bruto Nadale!”
Oncò ocore tornare a vìvare la felissità del Nadale sia pure co ’l ricordo de le persone care, anca con riconossenza verso de lore che, oltre a i tortèi co la zuca, le ne regalava anca i vèri valori, soratuto religiosi, del Nadale, che i xe propio quei drìo sconparire.
Xe da on tòco che sta festa cristiana cussì inportante, la ga perso el so significato pi profondo. ’Desso quelo che conta xe i regài, i pranzi e l’ansia de i preparativi.
Se parla poco de la celebrazion de la nàssita de Cristo. El nostro caro Gesù Banbin el ghe entra senpre de manco co ’l Nadale. La gente va poco in cesa e senpre manco ghe intaressa la religion.
Però, se volemo, semo ancora in tenpo de canbiare el nostro Nadale o almanco podemo provare a farghe ciapare i valori de senplicità e de gioia de na volta, de quando se se contentava del zugàtolo de legno, de on piato de tajadele fate in casa e de la torta Margarita, fata co i ovi de le to galine, senza zercare l’ultimo Samsung o le specialità culinarie giaponesi.
A Quatro Ciàcoe ghe disemo grazie de averne ricordà par 40 ani el significato del vèro Nadale.
Se femo tanti auguri… propio par questo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Adìo, Quatro Ciàcoe!
Semo za nel clima del Nadale, tenpo de le tradizion, de le nostre raise, de la senplicità de la nostra tera, de l’inpegno e la grinta par fàrghela… Ma noantri ne toca dirghe adio a “l’unico mensile che no inquina la mente”. Che pecà!
de Mario Sileno Klein
Da Lendinara (RO)
Ricordi de fine ano
Cesare Magon, arte e passion de un bibliotecario lendinarese.
de Laura Viaro
|
