Da Mestre-Venezia

La faraona de casa par Nadal

La bisnona Luigia che ga dà a me nona la riceta de la faraona, nel 1930.

La galina meleagra o faraona.

Morte de Meleagro e le sorele che pianse.

’Torno Pasqua, me nona cronpava dal forner na fugassa e coalche voveto de ciocolata da portar a i parenti che stava in canpagna, po’ la spediva me papà a portarghe sto presente co i auguri, ma el vèro scopo gera védar se le galine faraone fusse nate. Me papà, gavarìa selto le mèjo par andarle tor, ben passùe, ’torno Nadal.
Intanto el portava casa na bela galina da vovo, che la nona meteva in corte insieme a le altre. Na volta ghe go domandà parché la tegnesse le galine e no le faraone, la me ga risposto che se rivava na bestia e se ghe dava un nome, la vegneva a far parte de la fameja e no se gavarìa più avùo coragio de coparla e magnarla, par questo gera mèjo che le faraone stasse in canpagna dove le viveva contente e noaltri le gavaréssimo viste solo pronte par èssar messe in pignata.
Gera un rito quelo de cusinar la faraona par Nadal, go ancora soto el naso l’odor fastidioso del brustolin, che se sentiva có la pusava su la fiama del gas le ponte de le ale e de le sate par brusar le pene che no vegneva via.
Fata sta operassion, la meteva i tòchi de la farona su na tecia che vegneva doperada solo par cusinar sta bestia, la se serava in cusina e no la voleva èssar vista, parché la riceta gera un segreto de la fameja del nono che se tramandava da generassion e la vegneva insegnada solamente a la sposa del capofameja.
La nona faseva un strapo a la regola par mi, parché gero tanto pìcola e no gavarìa de sicuro robà ’sto segreto; me ricordo solamente i tanti vaseti da conposta che la verseva e serava, man, man che se cusinava la polastra, i càpari, el rosmarin, i limoni e vari atressi. Fintanto che la gera indafarada co sta longa operassion, parché no me sustasse più de tanto, la me contava de le galine faraone che gera originarie da l’Africa dove le viveva salvàdeghe più che altro ne l’Egito, la tera de i faraoni, par questo le se ciamava cussì; qua da noaltri le xe stae portàe da i antichi romani, dopo aver conquistà Cartagine, ma xe stà senpre bastansa difìssile alevarle, par via del caràtere barufante che le ga e no le se cata ben nel ponaro co le altre galine, le ga più gusto star solo fra de lore.
Po’ la nona me mostrava dó o tre pene che la gaveva rancurà, e mi restavo imagada a vardar quanto bele le gera bise o nere co tanti puntini bianchi, e no le gera cussì par caso, la diseva. La tacava ’lora a contarme una de le so tante storie, la me portava ne la Grecia del tenpo che fu, có ghe gera dèi e dèe, eroi, re, regine e tra lori anca el principe Meleagro, che la nona, sbaliando, ciamava Melagro; sto principe par cause de ogni sorta, xe morto.
Strasiàe le sorele no gera bone de darse pase, e le pianseva de note e de giorno, le sarìa morte de sicuro dal dispiasser, ma la dea Artemide, inpietosìa, le ga fate deventar osèi, ciamai galine meleagre, che sarìa le faraone, co pene scure pontesàe de bianco a ricordar le làgrime de ’ste tose disperàe.
Me domando ancora come la nona che gaveva fato solo le elementari podesse saver tante robe. Intanto tra na storia e st’altra la faraona gera cota e par casa se sentiva un profumo che inbalsamava, che el gavarìa fato resussitar i morti, la diseva.
E rivava el giorno de Nadal, su la tola el posto de onor gera par la FARAONA DE CASA, che tuti magnàvimo co gusto, la nona sentada vissin de mi; na volta me ga dito de desmentegarme de Melagro che oramai gera nato Gesù Banbin e le storie de le dèe e dèi no gera vere. Digo la verità, ghe so’ stada anca un poco mal. Quante volte la nona ga cusinà la faraona de casa... la bestia gaveva da èsssar de casada, pesar almanco un chilo e mezo, aver pene lustre, no èssar sbecotada sul colo, i tòchi gaveva da èssar né grandi, né pìcoli e la carne bela rossa: po’ tuto quel che ghe voleva par métar insieme, doveva èssar senpre de prima qualità.
Me ricordo che un giorno la nona, oramai veciota, ga mandà a ciamar la Gugelma, la sposa de un so nevodo, che gera deventà el capofameja e la ghe ga confidà el segreto de come cusinar la faraona. Xe passà tanti ani e anca la Gugelma xe morta, ma no sensa aver dà la riceta a so niora Giulia, che però no ga fiòi. Cussì la Giulia, parché la riceta no vada persa, la ga pensà ben de insegnarla a mi e mi la go za dita a me fia Chiara che la cusinarà anca sto ano a Nadal.
Ah, par quanto sia andada in serca, sta maniera de far la faraona, no la go leta o vista da nessuna parte. Bon pranso de Nadal a tuti.

[torna sopra]