Da la Bassa Veronese

Feste de dicenbre

La se fermava soto casa, co ’l gastaldo che parava on musseto tacà a on caretin pien de strafanti e zughi poareti. (foto da L’Arena)

Cissà parché, ma mi tra tuti i mesi de l’ano, anca se go on po’ de ’oja par el sole de l’istà (senza stòfego, però) e par i colori de l’autuno, questo l’è el mese che preferisso e son tuta in arion.
Forsi parché, dopo el periodo de i Morti, l’è tuto on seitar de bele ricorenze. Se scominzia giorni prima de l’8 dicenbre con la Novena de l’Immacolata. Me ricordo, soratuto che, da buteleti, se ’ndava a messa e po’ a rosario la sera par nove giorni. In chela festa, come ’desso, l’è tuto on scanpanìo de botezi. Le mame le ne preparava ben vestìe par la festa granda de la Madona e po’ pa ’l tesseramento de l’Azion Catòlica. A messa finìa, al Circolo, la presidente locale la ne consegnava, in modo solene, la tessera e el distintivo: prima a le Piccolissime, po’ a le Beniamine, dopo a le Aspiranti.
Finìa la consegna, le suore de l’asilo le ne preparava na ciocolata calda bona assè, co on calche biscotin, in tel salon del refetorio. Po’ restàene là a zugare fin a ora de magnare.
Dopo se spetava la festa del 13 dicenbre: Santa Lucia.
Intanto, a scola le maestre e a casa i grandi, i ne disèa:
“Fè’ pulito! Ché, senò, santa Lussia la ve porta el carbon!”
Adesso inveze el carbon dolze lo catemo su i bancheti in piaza, co le sagre.
Se spetava con ansia i doni de Santa Lussia. Éla la se fermava soto casa co el velo bianco su la facia, co ’l gastaldo che parava on musseto che tirava on caretin pien de strafanti e zughi poareti. A mi se alzava i penoti da l’emozion, parché la Santa, dato che me ciamo Lucia (come la nona de me mama, Lussia), portando el so nome, la me faséa na careza co le man coerte da i guanti bianchi.
Par mi e me sorela Luisa, de solito ghera na pueta de pezza, vestìa co tanta cura da me zia ’Gusta; par me fradeleti inveze ghera on caretin, ben laorà da me papà marangon o on s-ciopeto co la cana de lata. In più gavéene tuti el piato co na naranza, na caròbola, i moreti, dó caramele in sorte, na pasta frola fata a doneta.
Me ricordo ancora la poesia che m’avéa insegnà suor Gaetana e che diséa: “Santa Lucia bella / del mondo sei la stella / pe ’l mondo vai e vai e non ti stanche mai. / Porti confetti e doni / a tutti i bimbi buoni / così le tue casine / anche le più vicine, / anche le più lontane / in questa notte d’oro / hanno il tuo tesoro.”
Dal 13 de dicenbre oramai semo in clima de Nadale. Anca se la pandemia in sto tenpo l’à fato i so dani, panetoni, luminarie e ogni bendedìo, jè fora in bela mostra in te le boteghe par far de reciamo a la gente.
Za se pensa cossa inasiar da magnare par Nadale; ghè da far el presepio. L’àlbaro st’ano, co tuti sti disastri, inveze de portarlo ne le case, l’è mèjo piantarlo là ’ndo’ l’aqua l’à butà zo quei che ghera. Che desolazion! Pora gente de montagna!
Ma al pensiero che nasse el Banbin Gesù, come ogni ano, vien ’vanti na speranza nova.
St’ano po’, che se parla ’ncora de guera, penso a chele pore vìtime civili e a i soldà che à passà i so tristi Nadài in batalia, in mezo al fango, al fredo e a la neve. No dovemo mai desmentegarse de lori.
Ma Nadale l’è senpre Nadale.
Stemo ne la gioia de védare ancora chel Butin biondo che da la cuna de paja ne benedisse. E pensando e pregando, speremo che noantri tuti insieme, almanco in sto giorno benedeto, se possa vìvare in pace.

[torna sopra]