Da Lendinara (RO)

Ricordi de fine ano
Cesare Magon, arte e passion de un bibliotecario lendinarese.

Cesare Magon, secondo da sx. (foto de Paolo Siro Rossi)

Casa de le vacanze estive de Cesare Magon. (Foto de Gisella Paolin)

La piazéta dove ghe piaseva sostare e la Cesa del paese, dove xe nato Papa Luciani. (Foto de Gisella Paolin)

Se ’l fusse vivo, el gavarìa 120 ani e sicuramente el sarìa ancora al servizio de la citadinanza, de la cultura e de l’arte. Sì, parché Cesare Magon nato a Lendinara el 18 dicenbre 1902 da na fameja de umile estrazion sociale, el xe stà un punto de riferimento par tanta zente, soratuto zóvani, divulgando le so conossenze e passion in canpo artistico e teatrale, grazie a l’inpiego come bibliotecario – prima el faseva el barbiere – inte la biblioteca de Lendinara, incarico conferìo intel 1954.
Fondatore de la “Filodrammatica len­dinarese”, autodidata ma assolutamente (più de altri “studià”) a l’alteza de i so tanti ruoli, el xe stà regista, maestro de dizion, esperto musicale, valido consulente inte le ricerche sco­lastiche co’ la so umanità sensibile e senza pregiudizi, rispetosa del prossimo che lu el spronava a fare senpre mèjo. Tante xe le testimonianze de amighi e conossenti, articoli de la stanpa del tenpo, ben riportà intel libro “Cesare Magon. Arte e Teatro. Passioni di un bibliotecario lendinarese” de Ramis Tenan. Me stà a cuore menzionàrghene una, ca no’ xe contegnù intel libro e che come un regalo prezioso, me xe rivà giusto un ano fà par posta. Se trata de na létera scrita a man de Gisella Paolin, scritrice e segretaria del “El Graspo”, conossù atraverso el colaboratore Beppe Segalla intel corso de na premiazion a Rovigo. La fameja Paolin, in quel de Canale d’Agordo, la ghe dava ospitalità al sior Cesare inte le so vacanze estive. Na testimonianza, ca vien dal cuore e da la gratitudine par aver beneficià de le so “lezioni che giungevano con delicatezza e discrezione, non da un potere dato dall’alto di una cattedra bensì dalla dolcezza di un nobile cuore”. Na létera cussì delicata e devota che sarìa belo trascrìvare par intiero, tanta la xe la comozion che conpagna de solito i ricordi più veri e profondi.
A Canale d’Agordo Cesare el jera un ospite speciale, difati el magnava con lori anca se ’l gaveva sielto de ocupare na càmara in sofita par sentirse più libero o par paura de disturbare, eventualità poco probabile data la so estrema discrezion. Gisella la ricorda la visita al Studio Murer par la mostra de Renato Guttuso, de circa 50 ani fà, ocasion inte la quale la resta afassinà da l’entusiasmo de Cesare el quale “sapeva cogliere ogni sfumatura, ogni particolare… Lui vedeva, percepiva, ascoltava, interpretava. I colori erano parole, i tratti di pennello, il gesticolare delle mani, le forme, il racconto”. Cesare Magon el rivàva “fragile e pallido ai primi di luglio e verso fine agosto ritornava nella sua Lendinara con ritrovato vigore e gote colorate di montagna”, pronto par le fastidiose anca se sugestive fumare padane poco salutari, specialmente s’à no’ se ga el fisico de un toro. Na amicizia cussì inportante e sincera dimostrà fin a l’ultimo co’ la partecipazion de Gisella e de la so fameja al funerale de Cesare Magon, propio el 18 dicenbre del 1980, giorno del so 78° conpleano, dove, la fa notare l’autrice de la létera, no xe mancà la delusion par la scarsità de i presenti, a parte un grupeto de zóvani co’ le làgreme a i oci. “Erano i suoi ragazzi di teatro, consapevoli che per loro i giorni a venire non sarebbero stati più gli stessi senza la presenza rassicurante e preparata del loro maestro.”
Cesare Magon, “Cesarin Puazza” in gioventù, ricordà anca inte le publicazion de Cibotto, el ga rapresentà par quasi zinquant’ani l’animatore de la vita culturale de Lendinara, condividendo esperienze con personagi de altissimo spessore. El tuto (e tanto) cunzà dal so spirito liberale intel vero senso de la parola, privo de condizionamenti religiosi e politici e fondà su i più inportanti valori del vìvare comune. La so presenza, umile e grande al tenpo stesso, la alégia ancora inte i spazi de Palazzo Boldrin, sede de la biblioteca de Lendinara e la evidenzia, un fià dapartuto ormai, la mancanza de figure come la sua.

[torna sopra]