El re de la tola

El pan

Ancora incò fare el pan, la xe un’arte!

Semo rente al Nadale e vorìa parlare del pan, sto alimento che fa parte del nostro magnare de ogni dì da pi de 10.000 ani. Xe da dire che anca el Bon Dio, fàtose omo in Gesù Cristo, el se xe paragonà al pan:
“Io sono il pane vivo, disceso dal cielo, chi mangia di questo pane vivrà in eterno e il pane che io darò è la mia carne per la vita del mondo.”
No pretendo de fare na predica in preparazion al Nadale, ma sicome l’argomento el xe del pan me paréa giusto ricordare come, fin da le origini del mondo el sia deventà el re de la tola.
Pararìa incredibile, ma la storia del pan la scuminsia da i tenpi del cuco, da quando l’omo ga deciso de fermarse su sto mondo in serca de calcossa da métare soto i denti e doparare quelo che la tera ghe donava: le farine tiràe fora da i semeti de i cereali, i antenati del formento che ancora ’desso doparemo, scuminsiando da l’orzo, el méjo, la ségale e el faro.
El pan el xe un alimento universale: ancò no ghe xe Paese al mondo ’ndove no ’l sia presente ne le tole, in calche maniera e forma; el xe stà, e el continua a èssare, el sìnbolo de la storia, de la cultura, de la fame e de la richessa, motivo de la guera e de la pase nel mondo. Alimento de base, indispensabile par tuti i èsseri umani.
Tanti xe i significati che ghè stà dà al pan: el pan sacro, el pan laico, el pan ordinario, el pan quotidiano, sìnbolo de la figura stessa de l’umanità.
In risserche fate da esperti archeologi xe stà catà da i scavi tacà a la Giordania, le prime prove che se fasesse el pan za da 14.000 ani fà, prima ancora che l’omo se fermasse de girovagare e de dedicarse a l’agricoltura.
Xe da dire che i nostri antenati no conosseva la lievitassion e cussì i se contentava de pestare par ben le semenze che i catava, inpastare la farina co l’aqua e brustolare el tuto, a la bona, cusinàndola su piastre de piera scaldàe sul fogo.
A sta scola de vita, se pol dire che el pan el xe stà proprio quelo che ga fato laorare l’ingegno de l’omo: le tèniche e le trasformassion de i grani in farine, e la scoperta de la lievitassion, ga portà el pan a èssare motivo de trasformassion del sistema de vita che ancora incò ne vede testimoni.
El fenomeno de la lievitassion, a l’inissio, el vigneva considerà de origine sopranaturale: pa’ ’vere el magico avenimento, xe bastà desmentegarse par calche dì un inpasto de aqua e farina, tanto che ’l ga scuminsià a fermentare, el lievito madre, e dopo ’verlo cusinà, el pan se ga gonfià, deventando pi morbido e fàssile anca da digerire.
El fornaro, a chei tenpi, el jera inportante assè parché el jera considerà el custode del fogo. Ogni paese gheva un forno pùblico, e le fémene le ’ndava dal sacro fornaro, a cusinare le pagnote fate in casa.
El pan jera ligà a la fecondità de la tera, el gran de formento, soto tera, na volta sepeìo, el tornava soto forma de piantina che, cressùa, la dava na nova spiga piena de grani.
Ancora incò fare el pan, la xe un’arte: bisogna saver sèliere le mèjo farine parché el pan sia bianco; èssare esperti ne le tèniche de inpasto e cotura, utilizare i lieviti pi consiliài par far alzare la pasta e zontarghe spessie e aromi co estro e conpetenza.
Anca qua xe da dire che el progresso ga messo la satina: el pan vien inpastà, congelà e po’ cusinà al bisogno, fasendo pèrdare chel mistero de saver spetare tute le so fasi de preparassion. Par chi xe ocupà su sto mestiere la xe senpre na vita vendùa, se lavora solo de note parché a la colassion el pan sia pronto, caldo e fragrante.
Ne l’antica Roma fin dal I secolo a.C., su tute le tole el pan no mancava mai, el jera un alimento cussì inportante da èssare servìo anca ne le ostarìe e ne le taverne. El xe, e el sèita èssare ancora incò, el magnare base par squasi tute le fameje, tanto che ne la storia el deventa un servizio pùblico, controlà nel presso da i Comuni de ogni paese.
Calcossa che liga socialmente el potere al popolo soto forma de na aleanza, basta pensare a le lote in favore de la zente che ’ndava in piassa a rivendicare: “pane al popolo” parché no ’l ghesse da mancare ne le toe de nissun.
Come ghemo visto in te sto picolo discorso, el pan fin a i giorni de incò el ne fa védare come el sia par l’umanità la maniera de superare la fame e come, sto alimento, el gai na gran inportanza nel consumo comunitario, che se preocupa par la parte de popolassion pi puareta, che sofre e che lota par averlo.
Riporto qua na poesia de Gianni Rodari, na ode al pan.
IL PANE – “S’io facessi il fornaio / vorrei cuocere un pane / così grande da sfamare / tutta, tutta la gente / che non ha da mangiare. // Un pane più grande del sole, / dorato, profumato / come le viole. Un pane così / verrebbero a mangiarlo / dall’India e dal Chilì / i poveri, i bambini, / i vecchietti e gli uccellini. // Sarà una data da studiare a memoria: / un giorno senza fame! / Il più bel giorno di tutta la storia!”
Tornando a la predica par la festa del Nadale, ricordemo le parole del Papa:
“… mentre nel mondo continuano a consumarsi ingiustizie e discriminazioni verso i poveri, Gesù ci dona il Pane della condivisione e ci manda ogni giorno come apostoli di fraternità.”
A tuti: “Bon Nadale!”

[torna sopra]