| de Maria Penello Mingardi |
|
Da Vicenza
Na bruta facia
 |
| “Eco! Me lo inmaginavo!” |
“Riservatissima” jera scrito so la busta sensa intestassion che l’industriale Enrico Harnani el se girava fra i déi ’ncora sarà, come se ’l gavesse paura de vèrzarla. Elo no ’l gaveva gnente da scòndare a la giustissia, ma quela létara la ghe meteva ’dosso on serto timore; ghe jera quel so serto segreto. “Basta” el se gadito deciso, e el la ga verta, faséndolo diventare pàido, pàido. “Eco! Me lo inmaginavo” el ga mormorà, e el la ga leta:
“Sior Harnani, elo no ’l me conosse, ma mi lo conosso abastansa ben. Si ’n omo e un industriale onesto, nel vero senso corente, partanto no gavì paura de la lege. Ma come sarìa la vostra vita in fameja se vostra mojere la vignesse savere de na serta signorina? Quelo che elo el tien sconto co tanta gelosia? Un inferno, e xe apunto par questo che vojo risparmiàrghelo, in canbio de on paro de milioni, che i me procurerà el piassere de vignerli ritirare de persona, nel so uficio da le so stesse man. No penso che l’informarà la polissia, parché el mandarìa in preson el diàvolo, ma sarìa finìa la pace domestica. Faséndome conóssare, ghe ofro la garansìa de sparire ’pena gavarò vudo i schei, e elo el podarà tegnerse el segreto de la so bela signorina. El ghe deta a la so segretaria na létara co el me inderisso, co scrito: – In base al nostro afare lo invito a presentarse in uficio pa’ le ore sinque. – Ve presentarò la létara e me riceverè subito. No ghe sarà discussion e no parlaremo: me lassarè la busta co i schei e mi ve lassarò par senpre chieto.”
Enrico Harnani ’l jera ’n omo pratico e pronto ne le decision. El gaveva capìo che el so sacrifico finanziario el jera necessario, el ga ciamà la segretaria, faséndoghe scrìvare la létara. Dopo do giorni, ai sinque bòti precisi, se ga presentà in uficio ’n omo so la quarantina, co un vestito lindo, smarìo dal tenpo. Consegnà la létara a la segretaria, la lo ga fato passare subito ne l’uficio del paron. El sior Harnani, inpressionà da la facia de l’omo, lo vardava co timore: na facia dura, quadrata, bianca da métare i brividi. “El ga proprio na facia da criminale” el ga pensà. Ciapà dal casseto de la scrivanìa na busta sarà el ghe la ga consegnà, disendo: “Qua ghe xe tuto, el pole ’ndare.” L’omo co el viso duro e senpre più bianco, el ga ciapà in man la busta co maraveja e difidensa, disendo: “Ma mi…” el ga mormorà.
Harnani, dàndoghe na ocià da fulminarlo: “Elo el xe aposto, secondo i so desideri, el pole‘’ndare.”
Quelo el ga lassà l’uficio sconcertà, e l’industriale el ga ricominsià el so lavoro: ma pochi minuti dopo xe conparso el fatorin insieme a un sioro distinto sinpàtico. Harnani inpressionà da la bela presensa, el se ga alsà in pie slongàndoghe la man, diséndoghe: “Se no sbalio el xe el sior…” L’omo co un soriseto sornion lo ga apostrofà, disendo: “Capisso che ’l sia on fia titubante a darme el nome e cognome dopo quelo che xe capità.” Harnani, sercando de capire quelo che ’l voleva dirghe, el ghe ga oferto de le sigarete.
In quel momento xe ’ndà dentro de novo el fatorin, consegnàndoghe na busta. Riconossendo che la jera la sua, la ga verta frastornà. On pachetin de bilieti da sentomila i xe cascà so la scrivanìa insieme a un bilieto, conpagnà da ste parole: “Sior Harnani, go domandà un inpiego so la vostra assienda, ma no la vostra carità, anca se devo dire che la sia piutosto generosa e inverosimile. Son puareto, ormai a la fame, ma go ’ncora el me orgolio e sul lavoro sò de valere ’ncora qualcosa. Sofrirò la fame e farò sofrire, ma ghe dò indrìo i so schei.” Co tanto de firma e inderisso de casa.
“Ah, questa la xe fenomenale!” el ga dito el sior Harnani. “Védelo sti schei, sto pìcolo capitale? Dovevo dàrgheli a un lasaron, a na canaja, a uno che me ricatava… no inporta a dirlo, ma volevo risparmiarme serti dispiaceri. Beh! I xe ’ndà finire ne le man de uno che no conosso, de un puareto, quasi morto de fame che me li ga mandà indrìo. Ghe xe ’ncora de galantòmini a sto mondo! E pensare co quela bruta facia lo gavevo scanbià pa’ el me persecutore.”
El sioro ben distinto el ghe ga risposto, ridendo: “Mèjo cussì, parché quei schei i me vien de dirito, el vostro persecutore son mi.” L’industriale ansimante. “Ma la létara alora?”
El sioro co la facia tosta el ga risposto: “La létara pa’ un sbalio de la vostra inpiegata la xe ’ndà finire ne le man de un onesto omo, e quela indirissà a elo la xe rivà a mi, e la mia ècola lì infati.” Cussì disendo el se ga tolto sù i schei da la scrivanìa, meténdoseli in scarsela; po’ alsandose el ghe ga dito: “Prima de ’ndar via ghe dago un consilio, sior Harnani: el riciama chel’omo se no ’l xe ’n inbessile, el xe un valore che ’l pol èsserghe pressioso. Saluti, adìo.” Restà solo, l’industriale el ghe ga pensà on secondo, po’ el ga scrito do righe: “El vègna da mi: se spiegaremo, a go un posto degno de elo, nel me personale del diretivo.” Sonà pa’ un fatorin, el ghe ga consegnà la létara co l’órdine: “Subito a sto inderisso!” Sie mesi dopo el sior Harnani el benediva el sbalio de la so inpiegata e i schei persi, tirando la conclusion: mai fidarse de le aparense.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
