|
Sbiansi de civiltà contadina
L’eredità d’un tegnoso
 |
| Na so vissina de casa ca ghe faséa la bugà de nissiòi, mudanduossi e fanele on paro de volte a stajon… (foto de Agostino Bagnato) |
– Gavìo savùo, Bortolo, che chi oto magnafranze che comanda i Paesi pi siuri de la tera, no i xe stà boni gnanca stavolta de catarse intisi par deliberare tuti insieme na volontà ùgnola de darghe calcossa da magnare a chela pora zente d’Asia e d’Africa ca more de fame?
– Purassè, Saverio. Però, posto ca ghe semo, vegnendo al merito ne i vostri confrunti, la notissia no xe che la gai fato maraveja pi de tanto, da par mi, s’a penso che anca vu, siben ca no ve manca i vostri aviri e na fafà de pranprani la gavì messa via de sicuro, a si cossì tacagno che dal bisogno no ghe darissi on lazo da picarse gnanca a vostra mare, quela bonànema de fémana co on cuore cossì grando che no ’l gera gnanca suo. S’a fussi vu al posto de uno de quei capuriuni ve conportarissi te la stessa maniera. Vu no ghe somejè propio par gnente a vostra mare. A si uno de quei ca vive da poareto par morire sior. Vorìa capire cossa ca ve bala te quela zàgola destavelà s’a si vita sola anca vu, ’fà mi. Chi xe ca sbafarà tuta chela polpa tacà l’osso pien de megola ca ghi mucià, fasendo inorelare le scarpìe da l’ingiotauro fin al buso del bero, visto che le casse da morto ga el quercio ma no ga le scarsele?
– Ghe sbiro ai trìboli mi! – xe saltà suso st’altro co na coèga rossa ’fà le sbarbàgole d’on galo da sómena. – Vu pensè ca no sapia a che aqua trarme, ma mi tendo i fati mii de mi, gnente come vu ca ghe fè i cunti in scarsela de i altri. Savìo cossa ca ve digo? A ghi na boria bagolona vu ’fà ’na vaca piena sensa mai èssare sta montà da un toro. E po’ co sti discursi a m’i roto i tòtani ca ghe molo de zugare a carte co n’avocato sgajo e merdoso come vu.
– Mèjo cussì! Tanto, anca s’a perdì, có xe ora de pagare l’onbreta a fichè in scarsela el gomio par tore el tacuìn e me toca ’nare mi da l’osto co’ i euri in man, anca s’a go vinto. Fèvene in cunto, Saverio, che canùo ghe si romai da on bel tòco, altroché!
– Gheto sentìo che conversassion punzente che go spià più de recia che de ocio ieri dopodisnà, tolendo un cafè al bar Roma? Te savarè, barba, che da calche tenpo el Comune ga fato on acordo co ’l Circolo Tersa Età e ghe xe senpre pien de ansianoti che zuga a scóa o a tonbolon. Ti cossa ghe ne pènsito de sta portada?
– On batibeco rugante de sicuro! Te me ghè presentà na fondina inpastizà de maco e manài. Ghe vedo drento on senbroto de banbana e de desolassion incamesà, servìo te na guantiera ùgnola da on merdugo barbalache de boca larga e da on rafajon tegnoso, pi strucà de i corni in ponta. Cossa vuto, la miseria la go conossùa da rente anca mi e sensa èssare tirchio no go mai butà via el pisso a sbrancà, siben ca posso dire de no ’ver mai tribolà tel magnare. Serto dà bastansa fastidio savere ca ghe xe meso mondo che spèrpara e sguassa te l’onto e st’altro meso ca more da la slesia.
Noantri, fiosso, darcào ca se parla de crisi, oncò vivemo t’on Paese che magna e scussuma quelo ca podarìa sfamare i altri. No sò quanti quintài de pan che ogni giorno vaga a fenire te i biduni de le scoasse. Spionando na s-cianta pi distante del nostro naso, sensa far finta de no védare quelo ca sucede tel mondo, sparpajà traverso le notissie de i giornài e de le television, ghe sarìa solo da vergognarse. E no xe ca se trata de tirchiarìe mondiali, xe propio parché sti capi de stato co la pansa piena no i pensa a chi ghe rusa le buele da la sghissa e ’lora sbarca i desperài a Lampedusa.
Tornando a poma de chel Saverio ca te ga ’pena mensionà, vuto ca te cunta mi come che ’l ’ndarà a fenire chel tegnoso da l’ospia, magari bon da piànzare el morto par ciavare el vivo? Go bu propio el specio d’on ciuìn incagnìo ca me xe stà in fassa par tanti ani, on striozo spilorcio cressùo par man de maregna, ch’i lo toléa de soja parché da grando no ’l ga ’bu la boca in dolze da petarghe incoste a n’ànema zemela. Là in borgo Brambati, fra chi lo cognosséa puìto, squasio tuti de nominaja i ghe diséa “tacheta stitica”, da tanto tirà che ’l gera. Però gnente da dire so la ghigna de gran laoradore. Lu, a terzarìa in canpi, ghe daséa drento de sgobagnon co sapa e baile da on sole a l’altro, pur no ’vendo ’torno ’n arfio de vita da mantegnere. On bon tantunque de sesini che ’l ciapava el lo scondéa te na pietina, drento la fodra del pajon. A vien che co ’l vansare de i ani el s’à malà malamente de pissaùro. In marso ghe ga dà fora na ùlsara vessigosa soto la badoara da no èssare pi bon tegnere i spanti dal canolin. Siché el so dotore de condota par no lassarghe masarare le culate tel mojo el ga dovesto mandarlo soto i feri in ospeale. E intanto che ’l xe stà drento, na so vissina de casa ca ghe faséa la bugà de nissiòi, mudanduossi e fanele on paro de volte a stajon, intendendo farghe on ben, la ga pensà de sgudare el pajon e butare in mastela el telon inspissacià che ’l stanegava da ’ndare indrioschina. Dopo ch’i lo ga menà casa in caileto no ’l xe stà pi bon rapetarse al mèjo, el ga perso el magnare e in pochi misi el se gavéa tirà in seca ’fà na caròbola incandìa, ciapando on colore da sangiuto, tanto xe vero che co ’l primo garbin d’otobre el ga tolto el desturbo sensa fare bao. Solo có xe stà ora de pagare l’òbito, chi ca ghe xe ’ndà in t’i versi par primi, pensando de catare sconta na vegnola de minèle, i s’à reso cunto che ’l gavéa petà la sgorba ’fà on graizo, domè desteso sora on brazà de paja, sensa on tuìn tel bufeto. Tuta la bada de i so sparagni de na vita ruscosa se gavéa negà te la lissia par man distrata de chi, par pecà, intendéa farghe n’opra bona. Tiente inamente, fiosso, che “el sparagno d’on tacagno no fa guadagno”.
– Boja d’on can, ti, barba, no te bati mai un colpo a vodo. Grassie, le to parole xe senpre na lession de vita.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
