|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
 |
| Come se pol védare, on soriso xe el mèjo bilieto da vìsita… anca per Ilaria. |
Tradizion, costume, i tenpi, l’età, i sogni, voja de vìvare, na bona dose de incossienza… ne portava a nare incontro a sto mese de Febraro… col soriso te la boca e nel core.
Ne paréa de ’ver za lassà a le spale el longo inverno e che San Bastian co la viola in man el ghesse za desfà tuto el giazo te i fossi. La primavera ghea verto i oci e… “presto! némoghe incontro!”
A jera za da dopo la Veceta che strolicàvino come inbastire sù on costume da Carnevale, inpegnando tuta la fameja, ramenando le straze de i ùltimi casseti de i comò, furegando tra i vestiti veci e le tele messe via te le casse. Mudandoni, corpeti, capelini, sotoveste, fazoletoni, fazoleti rossi da naso, camise da note, recini, colane, strafanti de ogni tipo: tuto servìa par dare sfogo a la fantasia e a la creatività, e otegnere on mascaramento che no lo ghea nissun’altro.
E la gioja tel core, sotoventovìa, la cresséa de giorno in giorno. On velo de intima ironìa conpagnava le varie fase de preparazion. El soriso sbociava fora da i oci, da la boca, da le man… da tuto el corpo che respirava da i pori de la pèle chel’aria de spensierateza che costava poco gnente e no inquinava la mente.
Quela jera la cura ricostituente, el vacino che passava la Mutua de l’època, quela del “gente allegra, il ciel l’aiuta”.
E godéndose, soridévino, deventàvino conpagni de viajo de na socialità positiva, manifestàvino el nostro benèssare interno e la disponibilità ne i confronti de i altri.
Oncò la xe tuta nantra roba, se se gode in maniera difarente e senpre de manco; de conseguenza semo deventà on pòpolo de musoni e senpre manco disposto a regalare sorisi. Pecato, parché sto bel modo de comunicare el ga orìgini naturali, el xe on segno distintivo de la nostra spece ne i confronti de quele animali.
A partire da sùbito, da quasi ’pena vegnù al mondo, el pìcolo, anca solo vedendo na persona davanti de lu, el te regala quelo che da i esperti vien considerà el primo soriso “sociale”. Vol dire che el soriso fa parte del “linguagio” umano. Ma come tute le robe, anca el “linguagio” canbia, perdendo par strada tante bele maniere de raportarse: una tra queste, el soriso. E non solo quelo che nasse quando se xe drio gòdarse – quelo de Carnevale, tipico de on momento sereno e alegro –, ma quelo da spèndare ne i raporti normali co le persone, co la gente, col cliente, col paron, col dipendente, col studente, col paziente, col foresto…
Questa xe na gran pèrdita pa ’l gènere umano; senza la grazia e l’arma del soriso semo senpre piassè déboli ne l’afrontare i problemi e con manco comunichemo e trasmetemo fiducia, piassè se cataremo da soli. Soli, déboli e infelici.
Acetemo, dunque, la sfida de Febraro: magari co la scusa del Carnevale, tentemo de far rifiorire el soriso che ’l xe na grazia par l’omo e on ricostituente par l’umanità.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
