|
Da Lendinara (RO)
Piero Patata el vol maridarse
 |
| Piero Patata el gaveva ocià ’na tosa gran bela… |
Gera da un tòco che Piero Patata el gaveva ocià ’na tosa del so paese e, tute le doméneghe, el ’ndava a le Funzion inte la ceseta de S. Lazaro pa’ zercare de cognósserla. Ela, tra ’na ciaculatoria e un canto gregorian, tentando de no farse védare da chi ghe stava darente, la ghe mandava raquante ociade de consenso. ’Na sera che faseva ancora ciareto, ’pena finìa la Funzion, Piero el se gaveva finamente fato ’vanti, dimandando a sta fiola se ’l podeva filarghe drio.
“Bonasera, signorina, posso conpagnarla?” “Bonasera!... A so’ chì co le me amighe, quele lì che le sta vegnendo fora de cesa” e intanto che la diseva cussì le so conpagne le se faseva in parte, lassando da soli i do zòvani. “Alora, signorina, visto che le so amighe no le se fa ’vanti posso conpagnarla a casa?”
Un poco parché sto moscon l’insisteva, e un poco parché el ghe piaseva, la tosa acetava la proposta, slongando i passi de lòngo la carezà coèrta da i maronari. Cussì soto la fiaca luse del tramonto, che se inpirava tra i rami fissi de i àlbori, la copieta scuminziava a parlare e a bassa voze se sentiva dire: “Gera da tanto che volevo parlarghe, signorina, parché... ela la me piase” e ela, deventando tuta rossa, ghe rispondeva: “Lo go visto tute le doméneghe in cesa e vedevo che ’l me vardava...” e intanto che la ciacolada continuava, dal sotobosco vegneva sù, portà da i rèfoi de vento, un forte parfumo de fiori e erba mazipà. Tanto el gera forte sto odore che ghe imatoniva le teste, e le man le tacava cussì a suare e el cuore a balare tanto che un sgrisolòn se pardeva zo par la vita. I rivava a casa in sti stati, trovando la mama de l’Antonia in spàsemo e che la spetava sul meale de la porta. Alora la tosa co’ un fià de timideza ghe presentava Piero che, dopo i convenévoi, el vegneva invità a comodarse inte ’l tinèo. Tuta la fameja a quela presenza se sentava intornovìa a la tola, fasendo bela zièra a Piero che, fin che ’l parlava del più e del manco, el pensava: “go finamente trovà la dona justa par mi.”
Cussì pa’ tre stimane el zovanoto continuava, finià la Funzion, a menare casa l’Antonia e romai el sentiva che gera rivà el momento de fidanzarse da bon. Alora so pare, pa’ métare a posto le robe, ’na sera xe ’ndà a trovare la futura nora.
Inte la casa, furbìa sù pa’ l’ocasion, ghe gera tuta la fameja che in agitazion spetava de cognóssere el pare de Piero. “Vegnì vanti, sior Idelmo, e anca lu... come se ciamelo?” “Joani!.. ma i me amizi i me ciama Nani ciucia.” “Ma i se senta zò... e da ’ndove xelo lu ca no lo go mai visto da ste parte?” ghe dimanda la Zaira, mare de l’Antonia. “So’ da Bosco Brusà” ghe rispondeva Joani che pa’ l’ocasion faseva da testimonio. “Eco” continuava la Zaira “ve presento la me fameja!... Questo xe me marì Curzio e questi i xe i me fiòi: Marieta, Carleto e la me Antonia, ca savì ben chi che la xe.” (tuta so mare neta e spuà)
Dopo ste presentazion i se meteva a tola e, visto che qualcun el doveva dire coalcossa de intaressante, scuminziava a parlare l’Idelmo, toéndola a le longhe e daséndoghe drentro co tuto queo che pa’ do dì el gaveva masenà pa’ la testa.
“... Beh, insoma, quelo ca vojo dirve, ’l xe che me fiolo Piero el vorìa sposare vostra fiola Antonia e mi so’ chì pa’ savere cossa ca ghe ne pensè voaltri?”
La Zaira che in fameja la pareva la più sveja, la ghe rispondeva: “A cognossemo romai da parecio tenpo el sior Piero e ghemo capìo chel xe un bon omo e che ’l sa volerghe ben a nostra fiola, partanto semo contenti che i se sposa... Verò, Curzio?” Curzio, el gnoco de fameja, alora dopo aver butà lì do parole in crose, el meteva in tola un bocale de vin parché se fasesse festa in onore de i futuri sposi, e cussì l’aria ca girava pa’ la casa la deventava deboto più leziera; difati se rideva, se tracanava e raquanti spropositi i inframezzava la discussion.
Dopo un s-ciapo de ore passà in alegrìa, dal canpanìe de la cesa del paese rivava i tochi de le diese e Idelmo e Joani, pa’ no dar massa disturbo, i faseva sù le cane, portando la bona notizia al fiolo Piero.
“Tuto a posto, caro fiolo!... ’Desso, s’a te disi, sarìa el caso de andare a conprare i ori da Guglielmin.”
E cussì passando el tenpo a vegneva che Idelmo, Piero e l’Antonia i andava inte la botega de l’orefice e la futura sposa la se inpiniva i oci, zercando le robe che più ghe piaseva. Da la vetrina, indove gera messa in bèa vista la marcanzìa, la tosa la ociava do recini de granato e do anèi de oro. “Afare fato” diseva Idelmo che, dopo aver vardà la facia contenta de l’Antonia, tirava fora i schei senza dimandare sconti.
Tuto coreva pa’ el verso justo: i do zòvani i se voleva ben e i futuri suoceri i gera contenti. Sta roba ga fato che le do fameje le decideva de andare a trovare el pàroco del paese, che davanti a tuti i parenti faseva nuvizi Piero e l’Antonia.
A fine de la zerimonia tuta la conbrìcola l’andava a casa de la nuviza e, come l’usanza vole, i gaveva festejà co un bon rinfresco. Alora sentà a tola, tra ’na feta de brazadela e vin dolze, i vegneva a savere quanta roba la sposa la portava in dota e soratuto a chi ghe vegnarà dà l’incàrico de valutarla. Pa’ la stima i decideva de dimandarghe al sarte Felice de la Boarina che gera la parsona più brava pa’ ste robe e che gaveva fato ancora altri matrimoni in paese.
Cussì vegneva fissà e Felice, co vizin Piero, el contava la roba de l’Antonia, scrivendo in te un fojo el prezo che lu ghe pareva più vero. Purtropo no senpre quelo che gera stà pagà da la nuviza el vegneva confermà dal sarte, e tanto manco se podeva contrariarlo. Anca se sta roba la gera stà pagà de più de quel che stava pa’ èssare valutà, se doveva pa’ forza sbassare la testa parché comandava solo lu: el sior Felice. ’Na matina, finìo el lavoro del sarte pochi dì prima del matrimonio, Piero se faseva catare davanti la casa de l’Antonia co un caro tirà da quatro vache, nete e inbeletà da i corni a la coa.
“Bon dì, Antonia, so’ pronto pa’ portare via la dota.”
Tuto questo capitava inte l’ano 1896, quando Piero Patata, volendo trovare mojere gaveva incontrà l’Antonia, la dona del so cuore che ga sposà e volesto ben pa’ tanti ani ancora.
La doménega del dopodisnà, intanto che lu l’andava a l’ostarìa a zogare a le carte, ela l’andava inte la ceseta de S. Lazaro e, a la fine de la Funzion la trovava Piero a spetarla. Soto l’onbrìa de i maronari tornava anca i rèfoi de vento, che dal sotobosco i spandeva i parfumi de la natura, senpre viva come l’amore de i do sposini.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
