|
Da San Bonifacio (VR)
S. Polonia, i dentini da late e dopo…
 |
| Santa Polonia co le tenaje in man (Duomo de Como). |
El 9 febraro l’è la festa de Santa Polonia, vergine e martire del III secolo, vissùa a Alessandria d’Egitto e vìtima de la persecuzion de Decio. A chei tenpi i cristiani no i gavéa mia ’na vita assè façile, parché gh’era i pagani che ghe dava ’dosso par via de la religion, ma soratuto par aver modo de robarghe chel che i gavéa de valore in casa. Tuto chel che no valéa gnente, i pagani i lo brusava o i lo distrugéa.
Santa Polonia la gavéa alora ’na quarantina de ani e quando la ghè capità te le man, sti ’sassini i ghe ga roto le massele, faséndoghe saltar fora tuti i denti. No contenti, i ghe ga inpromesso de butarla te ’l fogo se no la gavesse recità insieme a lori de le frase che le riguardava la religion pagana.
Santa Polonia la ghe ga domandà de lassarla ’na s-cianta lìbara e in te ’n atimo la se ga butà ela te ’l fogo, metendo cossì fine a le so torture. Par el fato che ghè sucesso, la Santa l’è deventà la protetrice de i denti, de i dentisti e anca de i barbieri, parché anca sti artesani co le tenaje i faséa i stessi servizi de i dotori.
L’è belo tegner viva la tradizion de ’na Santa Polonia che la lassa zo la manceta ai buteleti, có ghe casca un dentin da late. De solito la mete i schei sul camin e cossì un butin el se desméntega el doloreto del tironçin che ghe ga lassà un buseto te la gengiva.
Anca mi, da buteleto, a go patìo le pene de l’inferno par via de i denti. Alora, cascà chei da late, no gh’era dentisti in paese che i li curasse: el dotor de fameja el te li cavava e ti te restài co un bel buso. Me ricordo de le note passà cainando par el male e alora me nona la ciapava la bozzeta che la gavéa su ’l comodin e co un batufoleto de coton, bagnà rento te ’l liquido, la me strupava el buseto del dente cariolà. Subito sentéa un gran calor che me infogava la boca e dopo un tòco el male el nava ia. Ma col passar del tenpo el buseto el se slargava senpre de pi, fin che ’l dente no ’l se ronpéa lassando a so ricordo la raisa. La medeçina l’era el creosòto, un liquido oleoso e senza color, ricavà dal catrame de legno de fajo. Pi che par curar i denti (che par la verità lu el sassinava) el servéa come disinfetante e come anticatarale.
Fasendo un fià de conti, el primo dentista vero ch’è vegnù te ’l me paese l’è rivà nel 1952, quando mi gavéa quatordes’ani. Se tratava de un bolognese che ’l s’à trapiantà da noantri e che l’era gran brao.
D’altra parte, senpre quando mi era buteleto, me ricordo de aver magnà un tòco de muro in fianco al me leto. No sò parché, ma la malta la me tirava te ’na maniera che no savéa far de manco, cossì col deéto la desfava e po’ la ciuciava. Go laorà cossì tanto de note, che go verto un bel buso te la periana. Pi avanti co i ani i ga scoperto che gavéa bisogno de calcio e mi, senza saère chel che faséa, me lo procurava desfando el muro de la càmara e magnàndomelo un poco a la olta. Sucede che spesso l’istinto el te fa far de le robe che se fa fadiga a crédare, ma che i è necessarie par la salute.
Senpre tornando ai denti, quando studiava a Bologna, a la vigilia de un esame assè inportante, m’è vegnù un mal de denti da devantar mato. Me zia, che l’era inpiegata al distreto militare, la me ga menà con ela al laoro e la me ga afidà al dentista che curava i soldà. Có me son sentà sul famoso sentaro de le torture, el dotor (?) el me ga vardà in boca e el ga concluso che gavéa un granuloma; cossì el ga deciso su do piè de cavarme el dente. Ma eco l’inghipo! Par poder cavar el dente malà, bisognava tirar ia ’n antro molare sano viçin e senza indormenzarlo. Durante le manovre, tira che te tira se ga roto la corona de chel sano, cossì el dotor el ga ciapà un caciavide e el me lo ga sfregolà; po’ el me ga cavà chelo malà. Finìe tute ste torture, el m’à cusìo in boca e el m’à dito che ’l me gavéa fato el ponte par un doman.
Pi che un ponte a mi me ga parso che ’l me gavesse verto ’na gran vale e oltre che aver la testa che me ruzava come un bresparo par via del maledeto caciavide, me sentéa un gran buso in boca. Pien de coton in boca e co la gengiva cusìa a la ganassa, che la se gonfiava come un balonçin de le feste de conpleano, son tornà a casa de me zia.
El dì dopo gavéa uno de i esami pi inportanti: un quadrienale de francese e có me son presentà davanti a la comission, ’pena bon de parlar e co la facia sgionfa cofà ’n’anguria, la titolare la me ga slongà la man e la me ga dito: “Arrivederci alla prossima sessione e tanti auguri per i suoi denti!” Cossì dopo aver studià come ’n ebete, me son dovù ritirar e go perso la session de esami.
Tenpo dopo go savù da me zia che ’l soldà, che faséa da infermier al dentista, el s’era sentìo mal a védar tuto chel che go soportà e i ga dovù portarlo fora dal studio par rianimarlo un fià.
Mi so solo che altro che Santa Polonia a go invocà in chei momenti e no de çerto par aver la manceta, ma parché la ghe desse un fià de solievo al me martirio.
Avanti co i ani, go çercà de sfrutar el famoso ponte, che mi gavéa batezà “de i sospiri”, anca par strupare el buso che me ga senpre dà un gran fastidio; ma tri denti li go pagà come el ponte che ga fato costruir el me amigo Toni “Quajeta” su la canaleta che ’l ga dedrìo casa in canpagna.
M’è vegnù in mente parfin un çerto Eugenio da la Prova, frazion del me paese, che tanti ani fà par risparmiar el s’à fato la dentiera col legno de rubina e ’l cortelin. Dopo aver beù un progno de goti de bianco a la sagra del vin de Monteforte, el legno el s’à cossì sgionfà che i se ga messo in du par cavarghe la dentiera da la boca, senò el se stofegava.
Mah! El gavéa reson el me amigo Bepi “Stanga” che ’l me diséa senpre: “Tiènteli da conto i denti, fin che te li ghè in boca, che dopo a i è dolori…Anca par el tacuin!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
