|
Da Rovigo
La stessa meraveja
 |
| A se vurìa vardare par l’ultima olta el sole zugare co le nùgoe… |
La stessa meraveja ca slargava de slusore i oci de on putin, pien de sole e de zoghi, inbanbolà a vardare a testa in su le nugoete bianche del zielo e a scoltare cantare i oseini de primavera, curioso de tuto e mai stufo de córarghe drìo a polan, rane e gaine, e intanto on ventesèo liziero el ghe careza el viso rosso de massèe e la boca vèrta senza denti par davanti, ca pare che tuto intorno a sia on paradiso terestre, confondéndose tra de lori insogni e desideri, realtà e fantasìa: cussì, co la stessa meraveja e co la stessa intensità, a se vurìa vardare par l’ultima olta el sole zugare co le nùgoe, ancora na olta come se ’l fusse sta fato solo par nantri, e scoltaremo cantare i oseini, xolando liegri par el zielo, come la prima olta, squasi a saludarne col stesso dolzore de la vita putina.
Bruto sarìa morire a note fonda, pieni de solitùdine come on orco, coegà in te on leto de spini e duluri de corpo e de ànema, tradìi da la vita ca se insognàvino par nantri, co le sporte piene de ogni bendedìo, ma che inveze la se ga inpenìo de egoismo e meschinità, solo par far schei e muciare potere su i altri, ca te basta on gran de sabia drento el figà opure on mal de denti ca te tormenta par tuta le note e mai no ’l finisse, par dirte quanto tenpo ca te ga speso inutilmente e quanti ani ca te ga rovinà, ani de la to vita, che la pare longa, ma che la dura tanto puòco.
E intanto ca te spendi el to tenpo par muciare, a te perdi el belo de l’esistenza, sto sole ca s’cioca, sto vento ca te subiòla in viso, sta piova ca te bévara, sta nieve ca te calma, e sta note fonda e piena de stele e del biondo de la luna, ca te indormeza fin al novo rivare del sole a saludare de luce la to càmara inbiancà e la to mente fresca e lìbara.
Sichè, có rivarà ca se finisse de desrodolare el gemo de la nostra esistenza, belo sarìa andare par el nostro destin co i oci pieni del bendedìo che senza pagare gnente a ghemo senpre abù in regalo: aria e luce, aqua e forza, movimento e pensiero, sentimenti e insogni...
E dopo a ’ndaremo drento come na spece da galerìa scura, ma là in fondo a vedaremo na luce granda e i visi cari de i nostri veci, a spetarne e rancurarne a brazi vèrti. (Ma vu, nona, spetème là de cao, ignonde che el tenpo senza tenpo se inbriaga de luce. A s’ciocava el sole su i primi insogni, che vu, nona, suridendo, benedivi).
E co luri a ritornaremo in tel mare universale, senza cunfini.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
